ಈ “ಆಟ” ದ ಪರಿಕಲ್ಪನೆ ನಮ್ಮ ಮನಸ್ಸುಡ್ ಮೂಡಿನಿ, ಜಗತ್ತ್ ಕೊರೊನ ಪನ್ಪಿನ ಒಂಜಿ ಸೀಕುದ ನಡುಟ್ ಫೋರ್ಮ್ಬೊಂದು ಜೀವ ಓರಿತ್ತೋನರೆಗ್ ಬೋಡಾದ್ ಇಲ್ಲಡ್ದ್  ಪಿದಾಯಿ ಬರಿಯೆರೆ ಪೋಡ್ಯೊಂದು ಇಪ್ಪುನ ಪೋರ್ತುಡ್. ನಮ ಪುಟ್ಟಿನ ಇಲ್ಲ್, ಬಲತ್ತಿನ ಅಪ್ಪೆ ನಾಡುನ್ ಬುಡ್ದ್ , ಬದುಕ್ಕುಗ್ ಒಂಜಿ ನೆಲೆ ನಾಡೊಂದು ಬತ್ತುದ್ ಈತ್ ಸಮಯ ಆಂಡಲಾ,ನಮ ಕಲ್ಪನೆನೆ ಮಲ್ಪಂದೆ ಇತ್ತಿನ ಒಂಜಿ ಜಾಗತಿಕ ಮಾಹಾಮಾರಿ “ಆಟ” ಪನ್ಪಿನ ಒಂಜಿ ಸಂಘಟನೆ ಪುಟ್ಯರೆ ಕಾರಣ ಆಂಡ್ ಪನ್ಪಿನವು ಒಂಜಿ ವಿಪರ್ಯಾಸನೇ ಸರಿ. ಆಂಡ ನಮ ತುಳುವೆರ್ನ ಮೈಯಾರ್ಗೆಡ್ ಬೈದಿನ ತುಳುವ ಸಂಸ್ಕೃತಿದ ಪ್ರಭಾವ, ಐತ ಕಡೆಕ್ ನಮಕ್ಕಿಪ್ಪುನ ಮೋಕೆ,ಅವ್ವೆಡ್ದ್ ಹೆಚ್ಚಾದ್ ಮುಲ್ಪ ಇಪ್ಪುನ ತುಳುವೆರೆನ್ ಒಟ್ಟು ಮಲ್ಪೋಡು ಪನ್ಪಿನ ಸಂಕಲ್ಪ ಬೊಕ್ಕ ದೂರದೃಷ್ಟಿ ಈ ಸಂಘಟನೆ ಸುರು ಮಲ್ಪುನಡೆ ಪಜ್ಜ ದೀಯೆರೆ ಕಾರಣ ಆಂಡ್.

ಕೈ ಬಿರೆಲ್ಡ್ ಲೆಕ್ಕ ಮಲ್ಪುನಾತ್ ಜನ ಸಮಾನ ಮನಸ್ಸುದ ತುಳುವೆರ್ ಈ ಅಮೇರಿಕ ದೇಶದ ಬೇತೆ ಬೇತೆ ಮೂಲೆಡ್ ಇತ್ತೆರ್ಡಲಾ ಈ ಒಂಜಿ ಸಂಘಟನೆನ್ ಸುರು ಮಲ್ಪರೆಗಾದ್, ಇತ್ತೆದ ತಂತ್ರಜ್ಞಾನನ್ ಗಲಸುದ್ ಅಗಲ್ನಾ ಅಗಲ್ನಾ ಇಲ್ಲದ ಚಾವಡಿಡೇ ಕುಲ್ಲೊಂದು ಯೀಯೊಂಜಿ ಸಂಘಟನೆನ್ ಪುಟ್ಟ್ ಪಾಡಿಯೆರ್. ಪ್ರತಿಯೊರಿಲಾ ಅಗಲ್ನ ಊರುದ ಕಾಲಮಾನದ ಬೊಕ್ಕ ಪ್ರಾದೇಶಿಕ ವ್ಯತ್ಯಸೋಲೇನ್ ಬರಿಕ್ ದೀದ್, ತನ್ಕುಲೆಡ್ದ್ ಸಾಧ್ಯ ಆಪಿನಾತ್ ಮಟ್ಟ್ ಪ್ರಯತ್ನ ಮಲ್ತಿನ ಫಲವಾದ್ ಉಂದುವೇ ಪ್ಲವ ಸಂವತ್ಸರದ ಬಿಸು ಪರ್ಬದ (ಏಪ್ರಿಲ್ 14 ,2021 ) ಎಡ್ಡೆ ಮೂರ್ತಡ್ “ಆಟ” ಪನ್ಪಿನ ಸಂಘಟನೆ ಉದೀಪನ ಆಂಡ್. ಈ ಉದಿಪನದ ಕಜ್ಜ,ತೋರಿಕೆಗ್ ಒಂಜಿ ಎಲ್ಯ ವಾಮನ ಪಜ್ಜದಂಚ ತೋಜಿಂಡಲಾ,ಭವಿಷ್ಯದ ದಿನೊಕ್ಕುಲೆಡ್ ಉಂದು ತ್ರಿವಿಕ್ರಮನ ಮುಟ್ಟುದಾತ್ ಮಲ್ಲೆಡ್ ಪಸರೊಂದು ಪೋಪುಂಡು ಪನ್ಪುನ ನಂಬಿಕೆ ಉಂಡು.

“ಆಟ”ದ ಮೂಲ ಉದ್ದೇಶ ಉತ್ತರ ಅಮೆರಿಕಾದ ಬೇತೆ ಬೇತೆ ಭಾಗಡ್ ಇಪ್ಪುನ ಮಾತಾ ವರ್ಗದ ತುಳುವೆರೆನ್ ಒಟ್ಟು ಮಲ್ಪುನ. ತುಳುನಾಡುಡ್ ಪುಟ್ಟಿನ ನಮ್ಮೂಲಾಯಿ ಬೇತೆ ಬೇತೆ ಅಪ್ಪೆ ಬಾಸೆ,ಧಾರ್ಮಿಕ ನಂಬಿಕೆ ಬೊಕ್ಕ ಪ್ರದೇಶವಾರ್ ಭಿನ್ನತೆಲು ಉಲ್ಲ. ಆಂಡ ಒತ್ತಟ್ಟಡ್ ತೂಂಡ ನಮ ಮಾತೆರ್ಲಾ ತುಳುವೆರಾದ್ ,ಈ ಮಾಮಲ್ಲ ತುಳುನಾಡ್ ದ ಸಾಂಸ್ಕೃತಿಕ ಬೊಕ್ಕ ಐತಿಹಾಸಿಕ ಪರಂಪರೆದ ಭಾಗನೇ ಅದುಲ್ಲಾ. ಅಂಚ ಉಪ್ಪನಗ ನಮ ಒವ್ವೆ ರೀತಿದ ರಾಜಕೀಯ ಆವಡ್, ಧಾರ್ಮಿಕ ಆವಡ್ ಅತ್ತುಡ ಬೇತೆ ಒವ್ವೆ ರೀತಿದ ಬಾಹ್ಯ ಒತ್ತಡಗ್ ಬಲಿಯಾವಂದೆ ನಮ್ಮ ಹಿರಿಯೆರೆಡ್ದ್  ನಂಕ್ ಬಳುವಳಿಯಾದ್ ಬತ್ತಿನ ಈ ತೌಳವ ಸಂಸ್ಕೃತಿನ್ ನಮ್ಮ ದುಂಬುದ ಎಲ್ಯ ಜನಾಂಗಗ್ ಪೊರ್ಲು ಪೊಲಿಕೆಡ್ ತೆರಿಪಾವುನ ಕೆಲಸ ಮಲ್ಪೋಡು. ಅಂಚನೇ ತುಳು ಬಾಸೆನ್ ಲಿಪಿ ಸಮೇತ ನಮ್ಮ “ಆಟ”ದ ಸದಸ್ಯೆರೆಗ್ ಕಲ್ಪಾದ್, ತುಳು ಬಾಸೆಡ್ ನಮ್ಮ ಹಿರಿಯೆರ್ ಬರೆದ್ ದೀತಿನ ಪಿರಾಕ್ ದ ಗ್ರಂಥೊಲೆನ್ ಇನಿತ್ತ ಪೊಸ ತಂತ್ರಜ್ಞಾನಡ್ ಸಂರಕ್ಷಣೆ ಮಲ್ತ್ ದೀದ್ ಆ ಮೂಲಕ ನಮ್ಮ ದುಂಬುದ ಪೀಳಿಗೆದ ಜೋಕುಲು ಐಟ್ ಮಲ್ಲ ಮಲ್ಲ ಸಂಶೋಧನೆ ಮಲ್ಪರೆ ಅವಕಾಶ ಮಲ್ತ್ ದೀವೊಡು ಪನ್ಪಿನವು ನಮ್ಮ ಈ ಸಂಘಟನೆದ ಮೂಲ ಉದ್ದೇಶಲು.

ನಮ್ಮ ತುಳು ಭಾಷೆ, ಉಭಯ ದಕ್ಷಿಣ ಕನ್ನಡ ಜಿಲ್ಲೆ ಬೊಕ್ಕ ಮಲಬಾರ್ ಪ್ರಾಂತ್ಯಡ್ ಮಸ್ತ್ ಜನ ವರ್ಗದ ವ್ಯಾವಹಾರಿಕ ಭಾಷೆ. ಉಂದು ಜಾತಿ ಧರ್ಮದ ಹಂಗ್ ದಾಂತೆ, ಭೌಗೋಳಿಕ ವ್ಯಾಪ್ತಿದ ಪರಿ ದಾಂತೆ ಸಾವಿರಾರ್ ವರ್ಸಾದ್ಡಿಂಚಿ ದ್ರಾವಿಡ ಭಾಷೆಲೆಡ್ ಬಾರಿ ಪಿರಾಕ್ ದ ಭಾಷೆ ಪನ್ಪಿನ ಪುರಾಪುನ್ ಪಡೆಯೊಂದು ಬೈದುಂಡ್. ಇನಿಕ್ ಪಂಚ ದ್ರಾವಿಡ ಭಾಸೆಲೆಡ್ ಮಸ್ತ್ ಪರತ್ ಬಾಸೆ ಪನ್ಪಿನ ಪುಗಾರ್ತೆ ಇಪ್ಪುನ ತಮಿಳ್ ಭಾಸೆದಾತೇ ಪರತ್ತ್ ಭಾಸೆ ನಮ್ಮ ತುಳು ಭಾಸೆ ಪಂದ್ ಜಗತ್ತುದ ಭಾಷಾ ವಿಜ್ಞಾನಿಲು ಪನೊಂದು ಉಲ್ಲೆರ್. ಅಂಚಿನ ಈ ತುಳು ಭಾಶೆನ್ ಬೊಕ್ಕ ಐತ ಒಟ್ಟುಗು ಬುಲೆಯೊಂದು ಬತ್ತಿನ ತೌಳವ ಸಂಸ್ಕೃತಿ ಅಂಚನೇ ಪರಂಪರೆದ ಬುಲೆಚ್ಚಿಲ್ಗ್ ನನಲಾತ್ ಕಾರಣ ಆಪಿಲೆಕ್ಕ,ತುಳುನಾಡುಡ್ದ್ ಸಾರಗಟ್ಟಲೆ ಮೈಲ್ ದೂರದ ಅಮೇರಿಕಾಡ್ ಕುಲ್ಲೊಂದು ಶ್ರೀ ಭಾಸ್ಕರ ಶೇರಿಗಾರ್, ಸಂಸ್ಥಾಪನೆದ ಕಾಲದ ನಿರ್ದೇಶಕೆರ್ ಬೊಕ್ಕ ತುಳು ಭಾಸೆದ ಸದಸ್ಯೆರ್ ಒಟ್ಟಾದ್ ಮಲ್ದಿನ ಪ್ರಯತ್ನದ ಫಲನೇ ಈ “ಆಟ” ಪನ್ಪಿನ ಸಂಘಟನೆ. ಈ ವಿನೂತನ ಸಂಘಟನೆಗ್ ಬೊಕ್ಕ ಉಂದೆತ್ತ ಜಾಲಾತಾಣಗ್ ನಿಗಲೆನ್ ಮಾತೆರೆನ್ ಅರ್ತಿ ಪಿರ್ತಿಡ್ ಎದ್ಕೊನುವ.

ನಿಗಲೆಗ್ ಸ್ವಾಗತ, ಸುಸ್ವಾಗತ!